Pailazo hirukoteak ‘Ez gara jaitsiko’ deituriko emanaldia eskainiko dute eta sarrerak dagoeneko salgai daude, 8€tan, Itziarko Harrera Bulegoan.
DEBA| Datorren apirilaren 13an, Pirritx, Porrotx eta Marimotots pailazoak Itziarren izango dira, dibertsioz eta algaraz beteriko haur ikuskizuna eskaintzeko.
‘Ez gara jaitsiko’ da pailazo hirukoteak eskainiko duen emanaldiaren izena eta arratsaldeko 18:00etan izango da, Itziarko Zabalsoro frontoian.
Sarrerak dagoeneko salgai daude, hain zuzen, Itziarko Harrera Bulegoan, 9:00-15:00 ordutegian. Pertsona bakoitzak gehienez 5 sarrera erosi ahal izango ditu, 8€tan bakoitza, eta esku-dirutan ordaindu beharko dira. Hauek ez dira zenbakituak izango, beraz, eserlekuak libreak izango dira.
Egunean bertan, frontoiko ateak ikuskizuna hasi baino 30 minutu lehenago zabalduko dira, hau da, 17:30ean.
Informazio gehiagorako, 943 19 92 55 telefonora dei daiteke.
Natura eta planetaren zaintza ardatz duen emanaldia
Ez gara jaitsiko ikuskizunean, Marimotots zuhaitz baten adaburura igoko da, han goitik lurra hobeto ikusteko. Pirritxek eta Porrotxek atzetik jarraituko diote. Eta zuhaitzez zuhaitz eta adarrez adar, espero gabeko lekuetara helduko dira. Bidai horretan, natura eta planeta zaintzearen garrantzia islatuko die ikusleei.
