Soraluzeko Emakumeon* Ahalduntze Eskolaren udazken-neguko egitaraua amaitzear dago
SORALUZE| Soraluzeko Emakumeon* Ahalduntze Eskolaren udazken-neguko egitaraua arrakastatsua izaten ari da eta datorren martitzenean, otsailaren 11n, izango da hurrengo hitzordu irekia emakume zein gizonentzat «Ama*, Eme*, Ume*» liburuaren aurkezpenarekin.
Soraluzeko Emakumeon* Ahalduntze Eskolaren udazken-neguko egitarauak harrera oso ona izan du; izan ere, arrakasta handikoak eta jendetsuak izan dira orain arte antolatutako ekintza guztiak. Udazken-neguko programazioari otsailean zehar emango zaio bukaera Ama*, Eme*, Ume* liburuaren aurkezpenarekin eta Soraluzeko Emakumeon* Topaketarekin.
Erika Lagomak eta Estitxu Fernandezek feminismotik eta amatasunetik pentsatu eta gauzatu dute liburua, hamahiru lekukotasun jasoz, hamaika ama eta bi aitaren testigantza bana: bikotedunak eta bikotegabeak, heterosexualak eta homosexualak, amabakarrak, adoptatzaileak, ama ez izatea erabakitakoak… Askotarikoak dira esperientziak eta bizikizunak, ugariak iritziak eta desberdinak mundu-ikuskerak; guztiak ere aberasgarriak eta zer pentsatua ematen dutenak.
Liburuaren aurkezpenaren ondoren idazleekin solasaldia egongo da. Aurkezpena Tolarekua aretoan izango da 18:30ean eta bertan zaintza zerbitzua egongo da, aurrez, izen-ematearekin batera eskatuta. Otsailaren 9a izango da zaintza zerbitzua eskatzeko azken eguna.
Izena emateko online, ondorengo galdetegia bete behar da: Ahalduntze Eskolako izen-ematea.
